កីឡាកររត់ប្រណាំងឆ្នើមជម្រើសជាតិកម្ពុជា វ៉ាន់ ភារ៉ា មានទម្លាប់ទទួលទានអាហារប៉ូវកាន់តែច្រើន ក្នុងរយៈពេល២ទៅ៣ថ្ងៃមុនការប្រកួតចម្ងាយឆ្ងាយចូលមកដល់។ គេថា អ្វីសំខាន់នោះ គឺទទួលបានកាន់តែច្រើន កាន់តែល្អ ពោលគឺ ហូបហើយហាត់ៗ។
ប៉ុន្តែជាមួយគ្នានេះដែរ ម្ចាស់កំណត់ត្រាម៉ារ៉ាតុងនៅកម្ពុជា ក៏តមអាហារណាដែលមានរសជាតិហឹរ ជូរ និងអាហារផ្អាប់ ដើម្បីបង្ការបញ្ហាឈឺក្រពះ ពោះវៀន។ នៅថ្ងៃប្រកួត មុនរត់មួយម៉ោង គេនិយមទទួលទានផ្លែចេក ឬ Gel ព្រោះជាអាហារដែលងាយរលាយ។
សូមជម្រាបថា វ៉ាន់ ភារ៉ា បានបំបែកកំណត់ត្រាថិរវេលាម៉ារ៉ាតុននៅកម្ពុជា ពេលចូលរួមប្រកួតក្នុងព្រឹត្តិការណ៍ម៉ារ៉ាតុននៅក្រុងហាណូយ ប្រទេសវៀតណាម កាលពីថ្ងៃអាទិត្យ ទី៨ ខែកុម្ភៈ ឆ្នាំ២០២៦។
គេបានបញ្ចប់នៅចំណាត់ថ្នាក់លេខ៤ដោយចាយពេល២ម៉ោង២២នាទីនិង៤៦វិនាទី។ នេះជាកំណត់ត្រាថ្មីនៅកម្ពុជា ដែលកំណត់ត្រាចាស់ គឺ ២ម៉ោង២៣នាទី និង២៩វិនាទី ធ្វើបានដោយអតីតកីឡាករជម្រើសជាតិ ហែម ប៊ុនទីង កាលពីជាង១០ឆ្នាំមុន។
