ខ្សែប្រយុទ្ធឆ្នើម កែវ សុខផេង នឹងឈានជើងចូលរោងជោគជ័យរោងជ័យសិរីមង្គលជាមួយអនាគតភរិយា គឺកញ្ញា មនោរថ នៅថ្ងៃទី០១ ខែវិច្ឆិកា ឆ្នាំ២០២០ ខាងមុខនេះហើយ ក្រោយពាក់ចិញ្ចៀនភ្ជាប់ពាក្យជាមួយគ្នានៅដើមឆ្នាំដដែលនេះ។
ពិធីជប់លៀងអាពាហ៍ពិពាហ៍របស់តារាបាល់ទាត់ក្លិបវិសាខា និងជម្រើសជាតិកម្ពុជាខាងលើនឹងត្រូវបានប្រារព្ធឡើងនៅមជ្ឈមណ្ឌលព្រីមៀរសែនសុខ ដែលគេរំពឹងថា នឹងមានមិត្តរួមអាជីព សាច់ញាតិបងប្អូន មិត្តភក្ដិយ៉ាងច្រើនចូលរួមកុះករ។
គួរដឹងដែរថា កែវ សុខផេង ចូលលេងក្លិបអាជីពដំបូងនៅបឹងកេត ឆ្នាំ២០១២ រហូតដល់២០១៥ ក៏បានផ្លាស់ទៅភ្នំពេញក្រោន។ រួមចំណែកជាមួយក្រុមជើងឯកលីគកំពូល៦សម័យ កីឡាករមានកំណើតនៅខេត្តក្រចេះបានផ្លាស់ទៅលេងនៅក្លិប PKNP នៃក្របខណ្ឌកំពូលម៉ាឡេស៊ី ជុំទីមួយ ឆ្នាំ២០១៨ ហើយក៏ចូលរួមជាមួយវិសាខា ជុំទីពីរ ឆ្នាំដដែលនោះដល់បច្ចុប្បន្ន។
ដោយសារតែភាពលេចធ្លោក្នុងបាល់ទាត់ ខ្សែប្រយុទ្ធរូបនេះត្រូវបានក្រុមហ៊ុនទាក់ទងថតផ្សព្វផ្សាយពាណិជ្ជកម្មទៀតផង៕
