ក្រុម Everton ក្រោមការដឹកនាំរបស់អ្នកចាត់ការ Carlo Ancelotti អាចក្លាយជាគូប្រជែងបន្ទាប់យ៉ាងពិតប្រាកដចំពោះ Liverpool។ នេះបើតាមការលើកឡើងរបស់លោក Jurgen Klopp។
Everton កំពុងឈរកំពូលតារាង Premier League ក្រោយឈ្នះទាំង៤ប្រកួតដំបូងជាប់គ្នាក្រោមការដឹកនាំរបស់លោក Ancelotti ដែលត្រូវបានតែងតាំងក្នុងខែធ្នូ២០១៩។
ពួកគេនឹងទទួល Liverpool ម៉ោង៦៖៣០ល្ងាច(ម៉ោងកម្ពុជា)ថ្ងៃសៅរ៍ទី១៧ខែតុលាឆ្នាំ២០២០។
មុនការប្រកួតរវាងក្រុមនៅ Merseyside ជាមួយគ្នានេះមកដល់ លោក Klopp បាននិយាយក្នុងកម្មវិធី BBC Football Focus ថា៖ «អ្វីដែលខ្ញុំគិតចំពោះ Ancelotti គឺមិនដែលជាអាថ៌កំបាំងទេ។ ខ្ញុំគោរពគាត់អស់ពីចិត្ត។ គាត់ជាបុគ្គលដ៏អស្ចារ្យម្នាក់។ ពេលខ្ញុំឮថាគាត់នឹងចុះកិច្ចសន្យាជាមួយ Everton ខ្ញុំបានគិតថា [អឺ… គូប្រជែងពិតៗមួយទៀតជិតមកដល់ហើយ]។ ពួកគេបានធ្វើជំនួញបានល្អឥតខ្ចោះក្នុងរដូវក្ដៅនេះ។ ពួកគេបានរកឃើញចំគោលដៅកីឡាករដែលពួកគេត្រូវការដើម្បីបង្កើនសមត្ថភាពក្រុមមួយដែលល្អស្រាប់រួចទៅហើយនោះ។ ពេលពួកគេនៅជាមួយគ្នាហើយស៊ាំនឹងអ្វីដែល Carlo ចង់ឱ្យពួកគេធ្វើ នឹងធ្វើឱ្យពួកគេក្លាយជាក្រុមដ៏ខ្លាំងមួយ»។
សូមរំឭកថា លោក Ancelotti ជនជាតិអ៊ីតាលី បានចូលដឹកនាំ Everton បន្តពីលោក Marco Silva ចុងឆ្នាំមុន។ លោកធ្លាប់បានឈ្នះជើងឯកលីគនៅអ៊ីតាលី អាល្លឺម៉ង់ បារាំង និង អង់គ្លេស និងថែមទាំងបានឈ្នះ Champions League ៣ដងថែមទៀតផងក្នុងនាមអ្នកចាត់ការ៕
