លោក អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជាបង្ហើបថា ការប្រកួតបាល់ទះជើងឯកថ្នាក់ជាតិដែលជាលីគកម្រិតអាជីព នឹងដំណើរការចុងឆ្នាំ២០២៣។ អ្វីកាន់តែពិសេសនោះ ក្រុមដែលចូលរួមអាចនាំចូលកីឡាករបរទេសបាន តែពេលចូលលេងអាចដាក់បានតែ២នាក់ប៉ុណ្ណោះ។
ថ្នាក់ដឹកនាំសហព័ន្ធសង្កត់ធ្ងន់ថា ការអនុញ្ញាតឱ្យមានកីឡាករក្រៅស្រុកនេះដើម្បីជួយពង្រឹងសមត្ថភាពបន្ថែមដល់ក្រុម។ ការប្រកួតអាចនឹងមាន៨ក្រុមចូលរួម។
លោក អាំង សេរីពិសិដ្ឋ អះអាងថា ក្រុមដែលអាចចូលរួមប្រកួតតេជោលីគបាន ត្រូវតែមានអាជ្ញាបណ្ណក្លិបដែលមានលក្ខខណ្ឌដូចជា គណៈគ្រប់គ្រង, ទីតាំង និងកីឡាករច្បាស់លាស់។ លោកបន្តថា ក្រៅពីតេជោលីគ សហព័ន្ធកីឡាបាល់ទះកម្ពុជាក៏គ្រោងរៀបចំការប្រកួតជាច្រើនទៀតដែរ ដូចជាពានរង្វាន់មហាជន ពានសម្ដេចក្រឡាហោម ស ខេង ជាដើមដើម្បីផ្ដល់ឱកាសដល់ក្រុមនានាបានចូលរួមប្រកួត។ មិនតែប៉ុណ្ណោះ ក្រុមល្អៗ ក៏អាចទទួលបានឱកាសទៅប្រកួតពានរង្វាន់ក្រៅស្រុកផងដែរ៕
