ក្លិបបាល់ទាត់ Police Tero នៃលីគកំពូលថៃបានបង្ហាញពីការចូលរួមហ្វឹកហាត់របស់អ្នកម្ចាស់ នរោត្ដម ម៉ាតេអូ ជាព្រះបុត្រារបស់ព្រះអង្គម្ចាស់ នរោត្ដម រ៉ាវីចក្រ ដែលធ្លាប់មានព័ត៌មានពាក់ព័ន្ធនឹងការទិញក្លិប Saint Etiene របស់បារាំងកាល២ឆ្នាំមុន។
សារព័ត៌មានកីឡាថៃ SiamSports ចេញផ្សាយនៅថ្ងៃព្រហស្បតិ៍ ទី២៨ ខែកញ្ញា ឆ្នាំ២០២៣ ព្រះអង្គម្ចាស់ នរោត្ដម រ៉ាវីចក្រ និងព្រះបុត្រា នរោត្ដម ម៉ាតេអូ បានយាងទតក្លិបបាល់ទាត់ Police Tero។ ប្រភពដដែលបន្ថែមថា ព្រះអង្គក៏សព្វព្រះទ័យក្នុងការគ្រប់គ្រងក្លិប ហើយក៏ឱ្យបុត្រាលេងនៅលីគថៃដែរ។
គួរដឹងដែរថា ព្រះអង្គម្ចាស់ នរោត្ដម រ៉ាវីចក្រ មានព្រះជន្ម៤៧ព្រះវស្សា និងជាព្រះរាជនត្តាព្រះបរមរតនកោដ្ឋព្រះមហាវីរក្សត្រ នរោត្ដម សីហនុ។ ព្រះអង្គជាបុត្រាបង្កើតរបស់សម្ដេចព្រះមហិស្សរា នរោត្ដម ចក្រពង្ស៕
