លោក Akihiro Kato ប្រធានក្លិបបាល់ទាត់អង្គរថាយហ្គឺរប្រាប់ថា ពេលកីឡដ្ឋានរបស់ខ្លួនមានឈ្មោះថា ថាយហ្គឺរត្រូវបានសាងសង់រួចរាល់ លោកមានគម្រោងរៀបចំការប្រកួតបាល់ទាត់ពានរង្វាន់យុវជនអន្តរជាតិមួយដើម្បីសម្ពោធផ្ទះថ្មី។
មិនតែប៉ុណ្ណោះ លោកក៏មានបំណងចង់រៀបកម្មវិធីប្រគំតន្ត្រី ដោយអញ្ជើញតារាចម្រៀងវណ្ណដាចូលរួមផងដែរ។ អ្នកជំនួញជនជាតិជប៉ុនសង្កត់ធ្ងន់ថា គម្រោងទាំងនេះមិនត្រឹមតែជាការបង្ហាញពីកីឡដ្ឋានរបស់ខ្លួនប៉ុណ្ណោះទេ អ្វីសំខាន់នោះ គឺចង់រួមចំណែកលើកស្ទួយទេសចរណ៍ដែលជាវិស័យដ៏សំខាន់មួយក្នុងខេត្តសៀមរាប។
កីឡដ្ឋានថាយហ្គឺរនឹងត្រូវបានចាប់ផ្ដើមសាងសង់ក្នុងខែវិច្ឆិកា ឆ្នាំ២០២៣នេះ និងធ្វើយ៉ាងណា ទាន់ការប្រកួតរដូវកាលថ្មី២០២៣/២០២៤។
សម្រាប់ទីតាំងវិញមានចម្ងាយប្រមាណ១០គីឡូម៉ែត្រពីផ្សាររាត្រីក្រុងសៀមរាប។ សម្រាប់ចំនួនផ្ទុកទស្សនិកជន គឺមាន៥០០០នាក់ ហើយក៏មានភ្លើងបំភ្លឺសម្រាប់ការប្រកួតពេលរាត្រីដែរ។ ការសាងសង់នេះកីឡដ្ឋាននេះមិនត្រឹមតែបម្រើការសម្រាប់បាល់ទាត់ប៉ុណ្ណោះទេ គឺថែមទាំងមានកន្លែងកំសាន្តផ្សេងៗ ដើម្បីជួយទ្រទ្រង់ជីវភាពក្លិប៕
