ឆ្លងកាត់ការប្រកួតកន្លងមក ក្លិបក្រសួងមហាផ្ទៃ ដណ្ដើមបានមេដាយច្រើនជាងគេដែលមានមេដាយមាស៨ ប្រាក់៧ សំរឹទ្ធ១១ សរុប២៦គ្រឿង។ ក្លិបកីឡាចំបាប់គិរីបារមីដំរីមានរិទ្ធ ឈរលេខ២ មានមេដាយមាស១ ប្រាក់១ និងសំរឹទ្ធ១ សរុប៣គ្រឿង។ លេខ៣ ក្លិបកីឡាចំបាប់បារមីមេទ័ពម៉ឺនឯក មានមេដាយមាស១ ប្រាក់១ និងសំរឹទ្ធ១ សរុប៣គ្រឿង។ លេខ៤ ក្លិបគិរី មានមេដាយមាស១ ប្រាក់១ សរុប២គ្រឿង។ ក្លិបកីឡាចំបាប់យាយព្រីងមានរិទ្ធ បានមេដាយមាស១គ្រឿង។
ក្លិបកីឡាចំបាប់តាគង់មានរិទ្ធ និង ក្លិបកីឡាចំបាប់ឫទ្ធីសែន បានមេដាយប្រាក់១គ្រឿងដូចគ្នា។ ក្លិបឃ្លាំងមឿង ក្លិបសមាគមខេត្តកណ្ដាល និងក្លិបបក្សីចាំក្រុងខេត្តកណ្ដាល បានមេដាយសំរឹទ្ធមួយគ្រឿងដូចគ្នា ខណៈក្លិបចំនួន៣ផ្សេងទៀតពុំទទួលបានមេដាយទេ។
ការប្រកួតកីឡាចំបាប់ជើងឯកថ្នាក់ជាតិ ឆ្នាំ២០២៤ បានប្រព្រឹត្តទៅនៅពហុកីឡដ្ឋានជាតិពីថ្ងៃទី២២ដល់ថ្ងៃទី២៤ ខែមករា ឆ្នាំ២០២៥ មានការចូលរួមពីក្លិបចំណុះក្រសួងស្ថាប័ន រាជធានី ខេត្តចំនួន១៣ ប្រកួតប្រជែងលើ១២វិញ្ញាសា ដែលក្នុងនោះបែងចែកជាវិញ្ញាសាបុរាណ និង សម័យ មានទាំងសម្រាប់បុរស និងនារី។
លោក Casey Barnett អនុប្រធានសហព័ន្ធកីឡាចំបាប់កម្ពុជាបានបង្ហាញការសាទរយ៉ាងខ្លាំងចំពោះការចូលរួមយ៉ាងផុសផុលពីបណ្ដាក្លិបនានា។ ថា នេះជាការចូលរួមដ៏មានតម្លៃ ព្រោះកីឡាចំបាប់ជាកីឡាប្រពៃណីមួយរបស់ខ្មែរដែលត្រូវបានថែរក្សារហូតដល់បច្ចុប្បន្ន។ កីឡាចំបាប់ក៏ជាកីឡាសក្ដានុពលមួយរបស់ជាតិ ដែលក្នុងព្រឹត្តិការណ៍កីឡាអាស៊ីអាគ្នេយ៍កន្លងទៅ កម្ពុជាអាចដណ្ដើមបានមេដាយដល់ទៅ២០គ្រឿង។ ដូច្នេះលោកសូមសរសើរ និងអគុណដល់ក្លិបទាំងអស់សម្រាប់ការចូលរួម។ ទន្ទឹមនឹងនេះ លោកក៏សប្បាយចិត្តពេលឃើញការចូលរួមយ៉ាងច្រើនផងដែរពីយុវជន។
