ក្រោយអស់ឱកាសក្នុងការប្រកួតប្រជែងបន្តពានរង្វាន់បាល់ទាត់ក្នុងសាលជើងឯករាជធានីភ្នំពេញរដូវកាលទី១ ឆ្នាំ២០២៤ យុវជន ម៉ែង ប៊ុនណារ៉ុង អ្នកចាំទីក្រុម SENA Angkor United បាននិយាយអំពីស្ថានភាពក្រុមខ្លួនដែលតែងតែរបូតគ្រាប់បាល់ច្រើនៗក្នុងមួយប្រកួតៗនោះដោយថាកើតចេញពីកត្តារួមផ្សំច្រើនរួមបញ្ចូលគ្នាជាក់ស្តែងដូចជាកត្តាកីឡាករខ្វះបទពិសោធលេងក្នុងបាល់ទាត់ក្នុងសាល ការមិនសូវបានប្រមូលផ្តុំហ្វឹកហាត់ជាប់លាប់ជាដើម។
យ៉ាងណាមិញយុវជនវ័យ២៤ឆ្នាំដដែលទទួលស្គាល់ថាក្រុមខ្លួននៅមានកម្រិតនៅឡើយ តែគេក៏បានបញ្ជាក់ពីជំហរក្រុមទាំងមូលថានឹងបន្តខិតខំបន្ថែមទៀតសម្រាប់ការអភិវឌ្ឍសមត្ថភាពក្នុងកីឡាមួយនេះ។ ប៊ុនណារ៉ុង បន្ថែមថាពេលខ្លះក្នុងនាមជាអ្នកចាំទីពេលដែលមិនអាចរក្សាសំណាញ់ទីក្រុមបាននិងតែងតែរបូតគ្រាប់ច្រើនខ្លួនក៏ធ្លាប់អាក់អន់ចិត្តនិងខ្លួនឯងផងដែរ។
ម៉ែង ប៊ុនណារ៉ុង ទើបតែប្រឡូកបាល់ទាត់ក្នុងសាលនេះបានប្រមាណជាង១ឆ្នាំនោះទេ ពោលគេបានឱកាសលេងដូចសព្វថ្ងៃនេះគឺកើតចេញពីការផ្តល់របស់ក្រុមបាល់ទាត់ក្នុងសាល SENA ANGKOR UNITED៕
