ដំណើរការចរចារបស់ Manchester United ដើម្បីផ្ទេរយក Jadon Sancho មក Old Trafford មានភាពរីកចម្រើនបោះជំហានទៅមុខមួយកម្រិតទៀតហើយ ក្រោយពួកគេបានឯកភាពលើប្រាក់ឈ្នួលប្រចាំសប្ដាហ៍និងកម្រៃជើងសារសម្រាប់ភ្នាក់ងារកីឡាករ។
ប៉ុន្តែមកទល់ពេលនេះ ភាគីក្លិបនិងក្លិបនៅមិនទាន់ត្រូវរ៉ូវគ្នាលើតម្លៃផ្ទេរនៅឡើយទេ ហើយក៏គ្មានការធានាអះអាងដែរថាកិច្ចព្រមព្រៀងមួយអាចកើតមានឡើងនៅមុនថ្ងៃបិទទីផ្សារដោះដូរនាថ្ងៃទី៥ខែតុលាឆ្នាំ២០២០។
BBC រាយការណ៍ថាប្រភពជិតស្និទ្ធនឹងក្លិប Borussia Dortmund បាននិយាយថាក្លិបយក្សអាល្លឺម៉ង់មួយនេះប្រកាន់ជំហររឹងត្អឹងដោយទារថ្លៃផ្ទេរជាង១០០លានផោន។
ទន្ទឹមនឹងនេះ មានការលើកឡើងមួយថា Dortmund មុខតែជាត្រូវលក់ Sancho ចេញ ដូច្នេះពួកគេអាចបន្ទន់ឥរិយាបថនៅពេលថ្ងៃបិទទីផ្សារខិតជិតដល់។ ស្របគ្នានេះ Man Utd ក៏ត្រៀមជម្រើសផ្សេងជំនួសដែរ ប្រសិនមិនអាចយក Sancho បានក្នុងតម្លៃដែលពួកគេផ្ដល់ឱ្យទេនោះ។
សប្ដាហ៍មុន Man Utd បានប្រកាសអំពីសមាជិកថ្មីទី១ក្នុងរដូវក្ដៅនេះគឺខ្សែបម្រើជម្រើសជាតិហុល្លង់ Donny van de Beek ផ្លាស់មកពី Ajax ក្នុងតម្លៃ៣៥លានផោន៕
