ក្រុមអតីតសិស្សវិទ្យាល័យ ហ៊ុន សែន ស្វាយអន្ទរ បានមូលមតិគ្នារៀបចំការប្រកួតបាល់ទាត់មិត្តភាពនៅថ្ងៃព្រហស្បតិ៍ ទី១៧ ខែកញ្ញា លើទីលានវិទ្យាល័យផ្ទាល់តែម្ដង ដោយមានការចូលរួមពីក្រុមចំនួន៤ គឺក្រុមអតីតសិស្សស្រុកស្វាយអន្ទរ, ក្រុមសិង្ហខ្មៅ, យុវជនឃុំពពឺស និងក្រុមឥន្ទ្រីខៀវ។
លោក សោម សារិទ្ធិ តំណាងអតីតសិស្សវិទ្យាល័យ ហ៊ុន សែន ស្វាយអន្ទរ ប្រាប់ AMS SPORTS ថា ការប្រកួតនេះធ្វើឡើងដើម្បីរឹតចំណងមិត្តភាព, រំឭកអនុស្សាវរីយ៍ក្នុងចំណោមសិស្ស និងមានកម្មវិធីសប្បាយៗផ្សេងៗទៀតដែរ។
បុរសសកម្មភាពក្នុងវិស័យកីឡារូបនេះរៀបរាប់ “៖បំណងគឺរឹតចំណងមិត្តភាព, សាមគ្គីភាព, សុខភាព និងរំឭកអនុស្សាវរីយ៍ក្នុងចំណោមអតីតសិស្សវិទ្យាល័យស្វាយអន្ទរដែលក្រោយមកប្ដូរឈ្មោះជាវិទ្យាល័យ ហ៊ុន សែន ស្វាយអន្ទរ។ ចប់ពីការប្រកួតនេះ យើងក៏ហូបអាហារសាមគ្គីជុំគ្នា និងមានកម្មវិធីកម្សាន្ដសប្បាយផ្សេងៗដែរ។”
សម្រាប់ការប្រកួតបាល់ទាត់មិត្តភាពនេះប្រព្រឹត្តទៅតែមួយរសៀលប៉ុណ្ណោះ ដោយចាប់ផ្ដើមពីម៉ោង១និង៣០នាទីរសៀលតទៅ៕
