កីឡាករដែលកើបលុយបានច្រើនបំផុតពីក្លិបបាល់ទាត់នៅប្រទេសចិន

ការអភិវឌ្ឍវិស័យបាល់ទាត់នៅប្រទេសចិន ចាប់ផ្ដើមមានសកម្មភាពផុសផុលខ្លាំងនៅឆ្នាំ២០១៦ ដោយក្លិបធំៗនៅក្របខណ្ឌ Chinese Super League ហ៊ានចាយលុយយ៉ាងច្រើនសំបើម ដើម្បីនាំយកកីឡាករល្បីៗកំពុងប្រកបអាជីពនៅក្លិបធំៗក្នុងទ្វីបអឺរ៉ុប មកចូលរួមក្នុងគោលបំណងបង្កើនភាពរីកចម្រើននៅក្នុងប្រទេស ដែលអាចប្រកួតប្រជែងជាមួយប្រទេសក្នុងតំបន់ និង មហិច្ឆតាចង់ក្លាយជាមហាអំណាចបាល់ទាត់នៅពេលអនាគត។

ប៉ុន្មានឆ្នាំចុងក្រោយនេះ កីឡាករល្បីឈ្មោះជាច្រើននាក់ បានសម្រេចចិត្តផ្លាស់មកលេងនៅលីគកំពូលចិន ដើម្បីមានឱកាសចូលលេងទៀងទាត់ ជាពិសេសទទួលបានលុយចូលហោប៉ៅ យ៉ាងច្រើនក្រាស់ក្រែល តួយ៉ាងមានកីឡាករប្រេស៊ីល Oscar និង Hulk ជាឧទាហរណ៍ស្រាប់។ ខាងក្រោមនេះជាកីឡាករ១០រូប ដែលមានថ្លៃឈ្នួលប្រចាំសប្ដាហ៍ថ្លៃបំផុតនៅប្រទេសចិន។

Oscar

កីឡាករប្រេស៊ីលរូបនេះ ចំណាយពេល៤ឆ្នាំលេងនៅក្លិប Chelsea ហើយជួយក្រុមតោខៀវឈ្នះ Premier League ពីរលើក និង Europa League ម្ដង។ ប៉ុន្ដែ Oscar បានសម្រេចចូលរួមក្លិប Shanghai SIPG នៅខែធ្នូ ឆ្នាំ២០១៦។

Oscar ទទួលបានឈ្នួលមួយសប្ដាហ៍ ៤០ម៉ឺនអឺរ៉ូ(ប្រមាណ ៤៨,៥លានដុល្លារអាមេរិក) ដែលធ្វើឱ្យរូបគេក្លាយជាកីឡាករបាល់ទាត់ដែលមានប្រាក់ឈ្នួលខ្ពស់បំផុតនៅប្រទេសចិន។ នេះបើតាមទិន្នន័យពីវេបសាយ Statista។

Cedric Bakambu

Cedric Bakambu ធ្លាប់ប្រកបអាជីពនៅបារាំង តួកគី និង អេស្ប៉ាញមុនពេលផ្ទេរទៅចូលរួមក្លិប Beijing Guoan។ ខ្សែប្រយុទ្ធវ័យ២៩ឆ្នាំរូបនេះ ធ្លាប់ជាប់ឈ្មោះនៅក្នុងជម្រើស១១នាក់ល្អបំផុតនៅ Europa League ប្រចាំរដូវកាល ២០១៥-១៦ កាលនៅលេងឱ្យក្លិប Villarreal ដែលធ្លាប់ត្រឹមវគ្គពាក់កណ្ដាលផ្ដាច់ព្រ័ត្រ ក្រោមថ្វីជើង Liverpool។

Bakambu ធ្លាប់ចូលលេងឱ្យឈុតយុវជនក្រុមជម្រើសជាតិបារាំង ប៉ុន្ដែក្រោយមករូបគេបានផ្លាស់លេងឱ្យជម្រើសជាតិកុងហ្គោវិញ ដើម្បីមានឱកាសលេងបានទៀងទាត់។ ការផ្លាស់មកកាន់ក្លិបចិន បានជួយឱ្យ Bakambu ស្ថិតនៅក្នុងចំណោមកីឡាករដែលរកចំណូលបានច្រើនបំផុតមួយរូបនៅលើលោក ហើយគេរកបាន ៣៧៥.០០០ អឺរ៉ូក្នុងមួយសប្ដាហ៍ (៤៥,៥ម៉ឺនដុល្លារអាមេរិក)។

Hulk

អំឡុងពេលប្រកបអាជីពនៅរុស្ស៊ី និង ព័រទុយហ្គាល់ Hulk ជួយក្លិបរបស់ខ្លួនឈ្នះពានរង្វាន់មួយចំនួនធំ ដែលក្នុងនោះមាន Europa League ម្ដងផងដែរ។ Hulk បានផ្ទេរទៅក្លិបចិន Shanghai SIPG នៅឆ្នាំ២០១៦ មុនមិត្តរួមក្រុមជម្រើសជាតិប្រេស៊ីល Oscar ប៉ុន្មានខែប៉ុណ្ណោះ។

ខ្សែប្រយុទ្ធវ័យ៣៣ឆ្នាំរកចំណូលពីក្លិបចិន មួយអាទិត្យ ៣២ម៉ឺនអឺរ៉ូ(៣៨,៨ម៉ឺនដុល្លារអាមេរិក) ប៉ុន្ដែរូបគេបានប្រកាសថា នឹងចាកចេញពី Shanghai នៅចុងឆ្នាំ២០២០ ក្រោយមានវិវាទជាមួយគ្រូបង្វឹក Vítor Pereira អំឡុងការប្រកួត AFC Champions League នៅកាតារ។

Graziano Pelle

Graziano Pelle ធ្លាប់ឆ្លងកាត់បទពិសោធយ៉ាងច្រើនក្រាស់ក្រែល ក្នុងអាជីពជាកីឡាករបាល់ទាត់ ដោយប្រលូកនៅអ៊ីតាលី អេស្ប៉ាញ និង ហូឡង់ មុនពេលផ្លាស់ទៅក្លិបអង់គ្លេស Southampton នៅឆ្នាំ២០១៤ ហើយក្រោយមក ក៏ចូលរួមជាមួយក្លិបចិន Shandong Luneng នៅ២ឆ្នាំបន្ទាប់។

ចំណាយពេល៤ឆ្នាំជាមួយ Shandong, Pelle ខ្សែប្រយុទ្ធវ័យ៣៥ឆ្នាំ រកគ្រាប់បាល់បាន ៦១គ្រាប់ ក្នុងការលេង ១២៥ប្រកួត ដែលរួមមាន ២៧គ្រាប់ ក្នុង៤០ប្រកួតនៅរដូវកាល ២០១៩ ធ្វើឱ្យរូបគេជាប់ឈ្មោះក្នុងជម្រើស១១នាក់ល្អបំផុតប្រចាំឆ្នាំនៅលីគកំពូលចិន។ ខ្សែប្រយុទ្ធអ៊ីតាលីរូបនេះរកបាន ២៩ម៉ឺនអឺរ៉ូ(៣៥ម៉ឺនដុល្លារអាមេរិក) ក្នុងមួយសប្ដាហ៍ ពីក្លិបបច្ចុប្បន្នរបស់ខ្លួន។

Stephen El Shaarawy

El Shaarawy ធ្លាប់សាងភាពលេចធ្លោអ៊ីតាលីជាមួយក្លិប AC Milan និង Roma មុនពេលផ្លាស់មក Shanghai Shenhua នៅខែកក្កដា ឆ្នាំ២០១៩ ក្នុងតម្លៃ១៦លានអឺរ៉ូ។ ខ្សែប្រយុទ្ធវ័យ២៩ឆ្នាំ ទទួលបានមួយសប្ដាហ៍ ២៩ម៉ឺនអឺរ៉ូ(៣៥,២៦ម៉ឺនដុល្លារអាមេរិក)ពី Shanghai Shenhua។

Paulinho

Paulinho បានផ្ទេរទៅចូលរួមជាមួយ Guangzhou Evergrande ពីក្លិបអង់គ្លេស Tottenham Hotspur នៅចុងខែមិថុនា ឆ្នាំ២០១៥ ជាមួយនឹងកិច្ចសន្យា៤ឆ្នាំ ប៉ុន្ដែបានត្រលប់ទៅប្រកបអាជីពនៅអឺរ៉ុបវិញ ជាមួយក្លិប Barcelona នៅ២ឆ្នាំបន្ទាប់។

ក្រោយចំណាយពេលនៅទឹកដី Camp Nou មួយរដូវកាល ខ្សែបម្រើប្រេស៊ីល ត្រូវបានក្លិប Guangzhou ខ្ចីត្រលប់ទៅវិញ ហើយទិញផ្ដាច់នៅរដូវកាលបន្ទាប់។ ក្លិបជើងឯក AFC Champions League ពីរសម័យ ចំណាយ២៧ម៉ឺនអឺរ៉ូ(៣២,៨ម៉ឺនដុល្លារអាមេរិក) សម្រាប់ប្រាក់ឈ្នួល Paulinho ក្នុងមួយសប្ដាហ៍។

Eder

Eder ទទួលបានបទពិសោធក្រាស់ក្រែល ពីការលេងបាល់ទាត់ ១៤ឆ្នាំនៅប្រទេសអ៊ីតាលី មុនពេលផ្លាស់ទៅក្លិបចិន Jiangsu Suning នៅឆ្នាំ ២០១៨។ ខ្សែប្រយុទ្ធវ័យ៣៤ឆ្នាំរកបានចំណូល ២៥ម៉ឺនអឺរ៉ូ(៣០,៤ម៉ឺនដុល្លារអាមេរិក)ក្នុងមួយសប្ដាហ៍ពីក្លិប Jiangsu Suning។

Marouane Fellaini

Fellaini អាចនិយាយបានថា ជាកីឡាករមានបទពិសោធច្រើនគួរសមនៅអង់គ្លេស ជាមួយក្លិប Everton និង Manchester United។ កីឡាករកម្ពស់ ១,៩៤ម៉ែត្រ បានចាកចេញពីទឹកដី Old Trafford ទៅចូលរួមជាមួយក្លិបចិន Shandong Luneng បន្ទាប់ពីអ្នកចាត់ការ Ole Gunnar Solskjaer ចូលកាន់តំណែងជំនួសលោក Jose Mourinho។ បច្ចុប្បន្ន Fallaini ទទួលបាន ២៤ម៉ឺនអឺរ៉ូ(២៩ម៉ឺនដុល្លារអាមេរិក)ក្នុងមួយសប្ដាហ៍ពីក្លិប Shandong Luneng។

Marko Arnautovic

អតីតខ្សែប្រយុទ្ធ Stoke City និង West Ham United, Marko Arnautovic ផ្ទេរមក Shanghai SIPG នៅខែកក្កដាឆ្នាំ ២០១៩។ Arnautovic រកបាន២៣ម៉ឺនអឺរ៉ូ(២៨ម៉ឺនដុល្លារអាមេរិក)ក្នុងមួយសប្ដាហ៍ពី Shanghai ហើយកីឡាករអូទ្រីសរូបនេះ ឈរនៅលំដាប់ទី៩ ក្នុងបញ្ជីកីឡាករទទួលបានប្រាក់អាទិត្យច្រើនបំផុតនៅក្របខណ្ឌកំពូលរបស់ចិន។

Alex Teixeira

កីឡាករចុងក្រោយក្នុងបញ្ជីអ្នកទទួលបានប្រាប់អាទិត្យច្រើនបំផុតទាំង១០នៅប្រទេសចិនគឺ ខ្សែប្រយុទ្ធ Alex Teixeira។ អតីតកីឡាករបស់ Shakhtar Donetsk រកចំណូលមួយអាទិត្យបាន ២១ម៉ឺនអឺរ៉ូ(២៥,៥ម៉ឺនដុល្លារអាមេរិក)ពីក្លិប Jiangsu Suning៕