ពានរង្វាន់ថ្មីមួយឈ្មោះថា European Super League ត្រូវបានព្រមព្រៀងគ្នាបង្កើតឡើងនិងប្រកាសជាផ្លូវការកាលពីរាត្រីថ្ងៃអាទិត្យទី១៨ខែមេសាឆ្នាំ២០២១ ដោយក្លិបបាល់ទាត់ធំជាងគេទាំង៣របស់អេស្ប៉ាញ, ធំជាងគេទាំង៦របស់អង់គ្លេស និងធំជាងគេទាំង៣របស់អ៊ីតាលី ដោយមានការគាំទ្រដោយធនាគារអាមេរិក JP Morgan ជាមួយទឹកប្រាក់ប្រមាណ៥ពាន់លានដុល្លារ។
ក្លិបណាខ្លះចូលរួម?
ក្លិបសហស្ថាបនិកទាំង១២រួមមាន Real Madrid, Barcelona, Atletico Madrid, Manchester United, Manchester City, Arsenal, Chelsea, Liverpool, Tottenham Hotspur, Juventus, Inter Milan និង AC Milan។ នៅមានក្លិប៣ទៀតដែលត្រូវបាននិយាយថារួចរាល់ដើម្បីចូលរួម មុនលីគនេះសម្ពោធរដូវកាលថ្មី។ ប៉ុន្តែក្លិបយក្សអាល្លឺម៉ង់និងបារាំង Bayern Munich, Paris St Germain មិនចូលរួមឡើយ។
នរណាគ្រប់គ្រងពាននេះ?
ប្រធានក្លិប Real Madrid លោក Florentino Perez ជាប្រធាន ESL ខណៈសហប្រធានក្លិប Man Utd លោក Joel Glazer ជាអនុប្រធាន ESL។
ESL លើកឡើងថាពាននេះគ្រាន់តែការជាបន្ថែមការប្រកួតពាក់កណ្ដាលសប្ដាហ៍ ហើយពួកគេនៅតែលេងពានក្នុងស្រុកដដែលជាធម្មតា។ ពួកគេថាពាននេះកើតឡើងនៅក្នុងពេលដែលសកលលោករងការរាតដ្បាតដោយជំងឺអាសន្នរោគដែលពន្លឿនអថិរភាពចំពោះម៉ូដែលសេដ្ឋកិច្ចបាល់ទាត់អឺរ៉ុបដែលកំពុងមាន។ បន្ថែមលើនេះ ពាននេះគឺដើម្បីបង្កើនគុណភាពនៃការប្រកួតប្រជែងនៅអឺរ៉ុប និងបង្កើតឱកាសសម្រាប់ក្លិបនិងកីឡាករកំពូលៗប្រកួតគ្នាជាប្រចាំរៀងរាល់ឆ្នាំ។
លោក Perez និយាយថា៖ «បាល់ទាត់គឺជាកីឡាសកលតែ១គត់ក្នុងលោកដែលមានអ្នកគាំទ្រជាង៤ពាន់លាននាក់ ហើយទំនួលខុសត្រូវរបស់ពួកយើងក្នុងនាមជាក្លិបធំៗគឺត្រូវឆ្លើយតបចំពោះការចង់បានរបស់អ្នកគាំទ្រ។ ពួកយើងនឹងជួយបាល់ទាត់នៅគ្រប់កម្រិត និងនាំវាទៅកន្លែងដ៏ស័ក្ដិសមបំផុតរបស់វាក្នុងលោក»។
ពាននេះលេងរបៀបម៉េច?
សេចក្ដីថ្លែងការណ៍របស់ ESL បញ្ជាក់ថាពួកគេចង់ចាប់ផ្ដើមពាននេះឱ្យបានលឿនបំផុតតាមដែលអាចលេងទៅបាន។ ការប្រកួតពានរង្វាន់នេះនឹងធ្វើឡើងនៅពាក់កណ្ដាលសប្ដាហ៍ (mid-week) គ្រប់គ្រងដោយក្លិបសហស្ថាបនិកខាងលើ ដែលត្រូវបានមើលឃើញថាជាការប្រជែងឥទ្ធិពលជាមួយពាន Champions League របស់ UEFA។
តាមផែនការ ESL មាន២០ក្រុមប្រជែងគ្នា ដោយក្នុងនោះ១៥ក្រុមជាសហស្ថាបនិក និង៥ក្រុមទៀតយកមកពីវគ្គជម្រុះប្រចាំឆ្នាំ។ ២០ក្រុមនេះត្រូវចែកជា២ពូល ហើយប៉ះគ្នាវិលជុំក្នុងផ្ទះនិងក្រៅផ្ទះ។ ក្រោយវិលជុំក្នុងពូលរួច ក្រុមលេខ១ដល់លេខ៣ប្រចាំពូលនឹងឡើងទៅវគ្គ៨ក្រុមចុងក្រោយ រួមជាមួយអ្នកឈ្នះ play-off រវាងក្រុមលេខ៤និងលេខ៥ប្រចាំពូល។ ការប្រកួតនឹងបន្តលេងក្នុងផ្ទះនិងក្រៅផ្ទះដែរ រហូតដល់រកឃើញបេក្ខភាព២ក្រុមសម្រាប់លេងផ្ដាច់ព្រ័ត្រតែ១ជើង។
ស្ថាប័នបាល់ទាត់ធំៗប្រតិកម្មបែបណា?
សហព័ន្ធកីឡាបាល់ទាត់ទ្វីបអឺរ៉ុប (UEFA) និងសហព័ន្ធកីឡាបាល់ទាត់ពិភពលោក បានបង្ហាញជំហរជំទាស់នឹងគម្រោងខាងលើ ដោយនិយាយថាពួកគេនឹងមិនទទួលស្គាល់ពាន European Super League ឡើយ។ ហើយថែមទាំងព្រមានដាក់បម្រាមក្លិបដែលចូលរួមលេងពានខាងលើមិនឱ្យលេងលីគក្នុងស្រុក, មិនឱ្យលេងពានរបស់ UEFA និង FIFA ហើយកីឡាកររបស់ក្លិបទាំងនោះអាចត្រូវបានហាមមិនឱ្យជាប់ជម្រើសជាតិ។
ទន្ទឹមនឹងនេះ សហព័ន្ធកីឡាបាល់ទាត់អង់គ្លេស (FA), សហព័ន្ធកីឡាបាល់ទាត់អេស្ប៉ាញ (RFEF), សហព័ន្ធកីឡាបាល់ទាត់អ៊ីតាលី (FIGC) រួមជាមួយ Premier League, La Liga និង Serie A សុទ្ធតែប្រឆាំងនឹងការបង្កើតពាននេះ។ សូម្បីនាយករដ្ឋមន្ត្រីអង់គ្លេស Boris Johnson រួមជាមួយ Legends របស់ក្លិបមួយចំនួនខាងលើដូចជា Gary Neville, Jamie Carragher, Danny Murphy ព្រមទាំងអ្នកគាំទ្រក្លិបទាំងនោះ ក៏រិះគន់ខ្លាំងៗលើការផ្ដួចផ្ដើមបង្កើតពាន ESL ថាជាការបំផ្លាញបាល់ទាត់យ៉ាងខ្លាំង។
នៅចំពោះមុខប្រតិកម្មទាំងនេះ ភាគី European Super League និយាយថានឹងជួបពិភាក្សាបន្ថែមជាមួយ UEFA និង FIFA ដើម្បីស្វែងរកដំណោះស្រាយដើម្បីបាល់ទាត់៕
