ក្លិប Nottingham Forest ដែលទើបឡើងមកក្របខណ្ឌ Premier League ជាថ្មីក្រោយបាត់មុខរយៈពេល២៣ឆ្នាំ បានទិញចូលខ្សែប្រយុទ្ធជម្រើសជាតិនីហ្សេរីយ៉ា Taiwo Awoniyi ពីក្លិប Union Berlin ក្នុងតម្លៃឯតទគ្គកម្មផ្ទាល់ខ្លួន ១៧លានផោន (២១លានដុល្លារ)។
Awoniyi រកបាន២០គ្រាប់ពីការចូលលេង៤៣ប្រកួតសម្រាប់ Union Berlin រដូវកាលមុន។ បើគិតតែក្នុងក្របខណ្ឌ Bundesliga ខ្សែប្រយុទ្ធរូបនេះរកបាន១៥គ្រាប់ពី៣១ប្រកួត គឺជាអ្នករកបានគ្រាប់បាល់ច្រើនជាងគេទី៦ក្នុងលីគកំពូលអាល្លឺម៉ង់ និងបានជួយ Berlin បានលេខ៥ក្នុងលីគ ហើយធានាបានកៅអី Europa League ជាលើកទី១តាំងពីរដូវកាល២០០១-០២មក។
ថ្វីបើលេចធ្លោនៅអាល្លឺម៉ង់ តែតាមពិតទៅ Awoniyi នេះជាអតីតកីឡាកររបស់ Liverpool។ គេបានផ្ដើមអាជីពនៅ Liverpool ក្នុងឆ្នាំ២០១៥ បន្ទាប់ពីបញ្ចប់ការបណ្ដុះបណ្ដាលនៅថ្នាល Imperial Soccer Academy។ ប៉ុន្តែ ខ្សែប្រយុទ្ធកម្ពស់១,៨៣ម៉ែត្ររូបនេះពុំដែលបានលេងឱ្យក្រុមហង្សក្រហមឡើយ ដោយត្រូវបានបញ្ចេញឱ្យក្លិបជាច្រើនខ្ចីជាបន្តបន្ទាប់។
Awoniyi បានលេងឱ្យ Frankfurt រដូវកាល២០១៥-១៦, NEC រដូវកាល២០១៦-១៧, Mouscron រដូវកាល២០១៧-១៨, Gent រដូវកាល២០១៨-១៩, Mainz 05 រដូវកាល២០១៩-២០ និង Union Berlin ខ្ចីក្នុងរដូវកាល២០២០-២១ មុនពេលទិញផ្ដាច់ពី Liverpool ឆ្នាំមុនក្នុងតម្លៃប្រហែល៦,៥លានផោន (៨លានដុល្លារ)។
បន្ទាប់ពីចុះកិច្ចសន្យា៥ឆ្នាំជាមួយ Nottingham Forest ដែលជាអតីតជើងឯកទ្វីបអឺរ៉ុប២សម័យកាលពីចុងទសវត្សរ៍១៩៧០ Awoniyi និយាយថា៖ «វាតែងតែជាក្ដីស្រមៃរបស់ខ្ញុំក្នុងការលេងក្នុងក្របខណ្ឌ Premier League។ ក្រោយបាននិយាយជាមួយលោកគ្រូ Steve Cooper អំពីមហិច្ឆតារបស់ក្លិប និងតាមរយៈប្រវត្តិសាស្ត្រអស្ចារ្យរបស់ក្លិប Forest ជាក្លិបដែលខ្ញុំចង់ចូលរួម»។
ចំណែក អ្នកចាត់ការ Forest លោក Steve Cooper បាននិយាយថា Awoniyi ជាកីឡាករដែលក្លិបលោកបានតាមដានយ៉ាងដិតដល់រយៈពេលពីរបីខែចុងក្រោយនេះ។ មានក្លិបជាច្រើនក្នុង Premier League និងក្លិបនៅលីគដទៃក្នុងទ្វីបអឺរ៉ុបចង់បាន Awoniyi ហើយលោកសប្បាយចិត្តណាស់ដែលខ្សែប្រយុទ្ធរូបនេះបានជ្រើសយក Nottingham Forest។
Awoniyi បានក្លាយជាសមាជិកថ្មីទី១របស់ Nottingham Forest តាំងពីឈ្នះការដំឡើងមកលីគកំពូលអង់គ្លេសជាថ្មី បន្ទាប់ពីបានធ្លាក់ចេញក្នុងឆ្នាំ១៩៩៩។ ហើយក្លិបនេះក៏បានឈានដល់ការព្រមព្រៀងជាមួយ Manchester United ដើម្បីខ្ចីអ្នកចាំទីអង់គ្លេស Dean Henderson ១រដូវកាល។ ក្លិបដែលធ្លាប់លើកពានលីគកំពូលអង់គ្លេស១ដង, FA Cup ២ដង និង League Cup ៤ដង ក៏កំពុងចរចាជាមួយ Mainz 05 ដើម្បីទិញខ្សែការពារកណ្ដាលបារាំងវ័យ២៦ឆ្នាំ Moussa Niakhate ផងដែរ៕
ប្រភព៖ BBC
