ការប្រកួតពានរង្វាន់ ខេមបូឌានលីគខាប់ឆ្នាំ២០២៣ឈានមកដល់សប្ដាហ៍ទី២ហើយ បន្ទាប់ពីការប្រកួតយ៉ាងស្វិតស្វាញនៅក្នុងសប្ដាហ៍ទី១កន្លងទៅ ក្នុងនោះក្រុមមកពីលីគកំពូលភាគច្រើន ទទួលបានជ័យជំនះទៅលើក្រុមមកពីលីគទី២ មានតែ ក្រុមអាយអេសអាយដង្កោសែនជ័យមកពីលីគទី២មួយប៉ុណ្ណោះ ដែលបានយកឈ្នះក្រុមអង្គរថាយហ្គឺរក្នុងលទ្ធផល៤ទល់នឹង២។ ចូលមកដល់សប្ដាហ៍ទី២នេះវិញ នឹងមានការប្រកួតកាន់តែជក់ចិត្តថែមទៀត ក្នុងនោះក្រុមខ្លាំងៗនឹងតទល់គ្នា្កនៅចុងសប្ដាហ៍នេះ៖
![](https://asset.ams.com.kh/sports/media/329130611_1359635724801341_6541257628026071083_n-1024x683.jpg)
នៅថ្ងៃសៅរ៍ ទី១៨ ខែកុម្ភៈ ឆ្នាំ២០២៣ ជំនួបក្នុងពូលBមានចំនួន៣គូរ នៅវេលាម៉ោង៣:៤៥នាទីរសៀល ក្រុមអាយអេសអាយ ដង្កោសែនជ័យ នឹងបើកកីឡដ្ឋាន AIA Stadium របស់ខ្លូនស្វាគមន៍ក្រុមណាហ្គាវើលដ៍ ហើយម៉ោងដំណាលគ្នានេះដែរ ក្រុមសូទីឡូអង្គរ ទទួលស្វាគមន៍ក្រុមរួមខេត្ត អង្គរថាយហ្គឺរ នាកីឡដ្ឋាន Hanuman Stadium ចំណែកនៅវេលាម៉ោង ៦:៣០នាទីល្ងាច ក្រុមខ្លាំងព្រះខ័នរាជស្វាយរៀងនឹងចាប់ផ្ដើមសប្ដាហ៍ដំបូង ជាមួយក្រុមម្ចាស់ជើងឯកចាស់ភ្នំពេញក្រោន ដែលការប្រកួតនឹងធ្វើឡើងនៅកីឡដ្ឋាន ARMY Stadium ។
នៅថ្ងៃអាទិត្យ ទី១៩ ខែកុម្ភៈ ឆ្នាំ២០២៣ ជំនួបក្នុងពូលAមានចំនួន៣គូរ ដែលការប្រកួតទាំង៣នេះនឹងធ្វើឡើងនៅវេលាម៉ោង៣:៤៥នាទីរសៀលដំណាលគ្នា ក្នុងនោះក្រុមកោះកុង ទទួលក្រុម សមាគមនកីឡាបាល់ទាត់ ខ.ភ.ម នៅកីឡដ្ឋានខេត្តកោះកុង និង ក្រុងព្រៃវែងហ្វេស៊ី បើកកីឡដ្ឋានព្រៃវែង ទទួលស្វាគមន៍ក្រុមមកពីខេត្តតាកែវ គីរីវង់សុខសែនជ័យ ចំណែកជំនួបធំប្រចាំសប្ដាហ៍ទី២ នេះ ក្រុមបឹងកេតហ្វេស៊ី បើកកីឡដ្ឋាន Cambodia Airways Stadium ត្រៀមស្វាគមន៍ក្រុមវិសាខា ។
![](https://asset.ams.com.kh/sports/media/329534753_885462979334627_9154036319749576251_n-819x1024.jpg)
សម្រាប់តារាងចំណាត់ថ្នាក់នៃពានរង្វាន់ខេមបូឌានលីគខាប់ឆ្នាំ២០២៣ បន្ទាប់ពីឆ្លងកាត់សប្ដាហ៍ទី១កន្លងឃើញថា នៅក្នុងពូល A ក្រុមសមាគមនកីឡាបាល់ទាត់ ខ.ភ.ម កំពុងឈរកំពូកតារាងមាន៣ ពិន្ទុ ឈរពីលើក្រុមលេខ២ គីរីវង់សុខសែនជ័យ និង ក្រុមលេខ៣វិសាខាដោយមាន៣ ពិន្ទុដូចគ្នា ប៉ុន្ដែខុសត្រង់ផលសងគ្រាប់បាល់ បឹងកេតឈរនៅលេខ៤ ព្រៃវែងលេខ៥ កោះកុងលេខ៦ និងអគ្គីសនីកម្ពុជាលេខ៧។ ចំណែកនៅក្នុងពូលB វិញ ណាហ្គាវើលដ៍ឈរកំពូលតារាង ដោយមានផលសងគ្រាប់បាល់លើសក្រុមលេខ២ អាយអេសអាយដង្កោសែនជ័យ និង ភ្នំពេញក្រោនដែលមាន៣ពិន្ទុដូចគ្នា ខណៈ ព្រះខ័នរាជស្វាយរៀងលេខ៤ មិនទាន់ឆ្លងកាត់ការប្រកួត អង្គរថាយហ្គឺរលេខ៥ សូលទីឡូអង្គរលេខ៦ និង នគរបាលជាតិឈរនៅលេខ៧។
![](https://asset.ams.com.kh/sports/media/328860635_1591438721306410_6030375518075021503_n-1-1024x1024.jpg)
![](https://asset.ams.com.kh/sports/media/330326634_984787649150097_4692780059695072239_n-1024x1024.jpg)
គួរអោយដឹងផងដែរថា ការប្រកួតពានរង្វាន់ Cambodian League Cup 2023 បានចាប់ផ្ដើមប្រកួតតាំងថ្ងៃទី១១ ខែកុម្ភៈ ឆ្នាំ២០២៣ មក គ្រោងបញ្ជប់ទៅវិញនៅថ្ងៃទី៤ ខែមិថុនា ឆ្នាំ២០២៣ ដែលមានក្រុមចូលរូមចំនួន១៤ មកពីលីគកំពូល និង ក្រុមពីលីគទី២ ហើយបានចែងចែកជា២ ពូលក្នុងនោះពូលា A មាន វិសាខា បឹងកេត ព្រៃវែង កោះកុង គីរីវង់សុខសែនជ័យ ទ័ព និង អគ្គីសនីកម្ពុជា ខណៈពូល B មាន ព្រះខ័នរាជស្វាយរៀង ភ្នំពេញក្រោន សូទីឡូអង្គរ អង្គរថាយហ្គឺរ ក្រុមអាយអេសអាយ ដង្កោសែនជ័យ ណាហ្គាវើលដ៍ និង នគរបាលជាតិ៕