Real Madrid នឹងធ្វើដំណើរទៅប្រកួត UEFA Champions League នៅទឹកដី Anfield ទល់ Liverpool នារាត្រីថ្ងៃពុធនេះដោយគ្មានវត្តមានរបស់សមាជិកសំខាន់ៗមួយចំនួនរួមមាន Vinicius Jr., Rodrygo និង Eder Militao ជាដើម ដែលបង្កជាក្ដីកង្វល់សម្រាប់អ្នកចាត់ការ Carlo Ancelotti ក្នុងការជ្រើសរើសកីឡាករប្រកួតទល់ក្រុមអង់គ្លេសដែលកំពុងចាប់ផ្ដើមរដូវកាលបានយ៉ាងល្អ។
ក្រុមការពារជើងឯកពុំសូវធ្វើបានល្អទេក្នុងពានអឺរ៉ុបរដូវកាលនេះ ដោយពួកគេទទួលបានជ័យជម្នះតែ២ដងប៉ុណ្ណោះក្នុង៤ប្រកួតនៃវគ្គចែកពូល ខណៈក្រុមហង្សក្រហម ទទួលបាន១២ពិន្ទុពេញ។
ទោះយ៉ាងណាក្ដី Real Madrid មានស្មារតីវិជ្ជមានបន្ទាប់ពីទទួលបានលទ្ធផលល្អក្នុងការប្រកួត La Liga ទល់ Osasuna ខណៈដែលសមាជិកមួយចំនួនដែលបានលេងក្នុងក្រុមជម្រើសជាតិនាខែវិច្ឆិកានេះ ក៏ធ្វើបានល្អផងដែរ។ Kylian Mbappe, Jude Bellingham, Dani Ceballos និង Arda Guler សុទ្ធតែបង្ហាញគុណផលល្អ ខណៈខ្សែការពារវ័យក្មេង Raul Asencio ក៏បំពេញតួនាទីរបស់ខ្លួនបានល្អដែរ ក្រោយមកជំនួសកន្លែងរបស់ Militao ដែលមានរបួស ACL។
លើសពីនេះទៅទៀត Real Madrid មិនស្គាល់ពាក្យថាបរាជ័យទេ ក្នុងជំនួប៣លើកចុងក្រោយនៅកីឡដ្ឋាន Anfield ដោយឈ្នះពីរលើក និងស្មើម្ដង រកគ្រាប់បាល់៨គ្រាប់ និងរបូតតែពីរគ្រាប់ប៉ុណ្ណោះ។
អ្នកចាំទីដៃទី១ Thibaut Courtois បានត្រលប់មកមកវិញហើយ ក្រោយខកខានពីការប្រកួត Champions League ទល់ Lille និង AC Milan។ ក្រុមដឹកនាំដោយលោក Ancelotti ទទួលបានជ័យជម្នះពីរលើកទល់ Stuttgart និង Borussia Dortmund ពេលមានវត្តមានរបស់ Courtois។ អ្នកគាំទ្រ Liverpool ប្រហែលជាមិនភ្លេចទេ ក្នុងប្រកួតផ្ដាច់ព្រ័ត្រ Champions League ឆ្នាំ២០២២ ពេលដែល Courtois សង្គ្រោះបាល់បាន៩លើក ទល់ក្រុមដែលមានតំបន់ប្រយុទ្ធមុតស្រួចដែលមានសមាជិកដូចជា Mohamed Salah, Roberto Firmino និង Sadio Mane។
មុនការប្រកួតមកដល់ អ្នកចាំទីបែលហ្ស៊ិក និយាយថា៖ “ការលេងនៅ Anfield ជាផលជាចំណុចមានប្រៀបសម្រាប់ពួកគេ។ ខ្ញុំយល់ច្បាស់ថាពួកគេត្រៀមយកជ័យជម្នះមួយប្រកួតមកវិញ ក្រោយចាញ់ផ្ដាច់ព្រ័ត្រក្នុងទីក្រុងប៉ារីស និងចាញ់ក្នុងវគ្គ១៦ក្រុមចុងក្រោយ ក្នុងឆ្នាំ២០២៣។ ពួកគេនឹងបានសងសឹក ប៉ុន្ដែខ្ញុំសង្ឃឹមថា យើងអាចយកឈ្នះពួកគេ”។
“បន្ទាប់ពីច្រើនឆ្នាំក្រោមការដឹកនាំដោយលោក Klopp, Liverpool មានអ្នកចាត់ការថ្មី។ ពេលនេះជាមួយលោក Arne Slot ពួកគេមានការបត់បែន តំបន់ប្រយុទ្ធមានធាតុផ្សំដូចពីមុនផងដែរ ដូចជាការដាក់សម្ពាធ ការវាយសម្រុកច្រើន ការលេង Counter បានល្អ និងល្បឿនលឿនក្នុងតំបន់ប្រយុទ្ធ។ យើងត្រូវតែរកវិធីទប់ទល់ភាពខ្លាំងរបស់ពួកគេ”។
ដោយឡែក ខ្សែការពារស្លាបឆ្វេង Ferland Mendy ដែលអវត្តមានកាលពីចុងសប្ដាហ៍ ក៏ត្រូវបានរំពឹងថា នឹងត្រលប់មកវិញដែរ ដោយលោក Ancelotti បានបញ្ជាក់ក្នុងសន្និសីទសារព័ត៌មានក្រោយចប់ការប្រកួតទល់ Leganes ថាគេនឹងក្លាយជាចំណែកសំខាន់ក្នុងការប្រកួតទល់ក្រុមហង្សក្រហម។
ទោះយ៉ាងណាក្ដី មានសមាជិកក្រុមធំចំនួន៦រូបដែលមិនអាចចូលរួមការប្រកួតនេះបានដោយសាររបួសរួមមាន Militao, David Alaba, Dani Carvajal, Aurelien Tchouameni, Rodry និង Vinicius Jr. ដែលរកគ្រាប់បាល់ពីរគ្រាប់ និង assist ២គ្រាប់ ក្នុងលើកចុងក្រោយដែល Madrid ប្រកួតនៅទឹកដី Anfield កាលពីខែកុម្ភៈឆ្នាំ២០២៣។
Lucas Vazquez អាចត្រលប់មកវិញបាន ក្រោយសះស្បើយពីរបួសកាលពីដើមខែវិច្ឆិកា ប៉ុន្ដែបើយោងតាមសារព័ត៌មានអេស្ប៉ាញ AS, Fede Valverde អាចនឹងលេងក្នុងជម្រើសដំបូងក្នុងតំណែងខ្សែការពារស្លាបស្ដាំ ដែលមានន័យថា រវាង Arda Guler ឬ Dani Ceballos មានម្នាក់នឹងលេងក្នុងតំបន់បម្រើ។ ការសម្រេចចិត្តគឺអាស្រ័យលើលោក Ancelotti ថាតើចង់បានខ្សែបម្រើជួយប្រយុទ្ធឬខ្សែបម្រើដែលចែកបាល់នៅតំបន់កណ្ដាល។
ជម្រើស១១នាក់របស់ Real Madrid នឹងត្រៀមលេងទល់ Liverpool យប់នេះអាចជា៖ អ្នកចាំទី៖ Courtois ខ្សែការពារបួនរូប Mendy, Asencio, Rudiger និង Valverde ខ្សែបម្រើមាន Modric, Camavinga, Bellingham និងម្នាក់ទៀតរវាង Ceballos និង Guler ខណៈប្រយុទ្ធមាន Mbappe និង Brahim Diaz៕
