ខ្សែប្រយុទ្ធ Kylian Mbappe របស់ក្លឹប Real Madrid មិនគួរត្រូវបានយកមកប្រៀបធៀបជាមួយនឹងអតីតតារាឆ្នើមបារាំង Thierry Henry នោះទេ នេះបើយោងតាមការលើកឡើងរបស់អតីតខ្សែការពារ Manchester United លោក Patrice Evra។
Mbappe តែងត្រូវបានយកមកប្រៀបធៀបជាមួយនឹងលោក Henry ចំពោះអាជីពបាល់ទាត់របស់អ្នកទាំងពីរ ដោយសារតែសមត្ថភាពក្នុងការបញ្ចប់ទី និងល្បឿនបម្លាស់ទីលើទីលានប្រកួត។
Mbappe ត្រូវការតែបីគ្រាប់ទៀតប៉ុណ្ណោះសម្រាប់ក្រុមមាន់គកបារាំង ដើម្បីអាចតាមស្មើម្ចាស់កំណត់ត្រា Top Scorer លោក Henry ហើយអតីតខ្សែប្រយុទ្ធ Arsenal និង Barcelona ផ្ទាល់ក៏បានអះអាងថា គេអាចនឹងមានអាជីពប្រសើរជាងរូបលោក ទោះបីជា Mbappe ទើបតែមានវ័យត្រឹមតែ២៦ឆ្នាំក៏ដោយ។
លោក Henry ត្រូវបានចាត់ទុកថាជាខ្សែប្រយុទ្ធឆ្នើមមួយរូបក្នុងប្រវត្តិសាស្ត្រ បាល់ទាត់ ដោយលោកទទួលបានភាពជោគជ័យទាំងសម្រាប់ក្លឹប និងក្រុមជម្រើសជាតិ ជាពិសេសធ្លាប់ឈ្នះ UEFA Champions League ជាមួយ Barcelona និង FIFA World Cup ជាមួយក្រុមមាន់គកបារាំង។
ក្រោយបញ្ចប់អាជីពជាកីឡាករ លោក Henry ហាក់មិនឆ្ងាយពីបាល់ទាត់នោះទេ ដោយលោកបានប្រលូកការងារជាគ្រូបង្វឹក និងជាអ្នកវិភាគតាមទូរទស្សន៍។ ហើយបុរសវ័យ៤៧ឆ្នាំ កាលពីថ្មីៗនេះបានដឹកនាំក្រុមម្ចាស់ផ្ទះបារាំងឡើងផ្ដាច់ព្រ័ត្រ ក្នុងព្រឹត្តិការណ៍ Paris Olympics តែបញ្ចប់ក្នុងនាមជាជើងឯករងក្រោយចាញ់អេស្ប៉ាញ។
ដោយឡែក Mbappe ក៏ធ្លាប់ឈ្នះជើងឯកបាល់ទាត់ពិភពលោកផងដែរ និងជាអ្នករកគ្រាប់បាល់ច្រើនបំផុតសម្រាប់ PSG មុនពេលចាកចេញពីទឹកដី Parc des Princes នាដំណាច់រដូវកាលមុន។
អតីតតារាឆ្នើមរបស់ PSG ចំពោះការរិះគន់រូបគេតាំងពីផ្លាស់ទៅចូលរួម Real Madrid ហើយអតីតកីឡាករបិសាចក្រហម និងក្រុមជម្រើសជាតិបារាំង លោក Evra ក៏ជាម្នាក់នៅក្នុងចំណោមនោះផងដែរ។ លោក Evra យល់ថា ម្ចាស់អាវលេខ៩ថ្មីរបស់ Real Madrid មិនទាន់អាចត្រូវបានការទទួលស្គាល់នៅឡើយទេ ជាពិសេសការប្រៀបធៀបជាមួយអតីតខ្សែប្រយុទ្ធដ៏ជោគជ័យដូចជា Thierry Henry។
ក្នុងកម្មវិធី Rothen S’enflamme លោក Evra បាននិយាយថា៖ “នៅពេលដែលអ្នកចាប់ផ្ដើមនិយាយថា Mbappe ជាកីឡាករល្អបំផុត ឬជាម្នាក់ក្នុងចំណោមកីឡាករល្អបំផុត ខ្ញុំកំពុងគិតថាគេមិនទាំងស្ថិតក្បែរ Jean-Pierre Papin ផង។ សូមកុំប្រៀបធៀប Mbappe ជាមួយ Thierry Henry។ សូមកុំប្រៀបធៀបជាមួយគាត់ឱ្យសោះ។ សម្រាប់ខ្ញុំ Mbappe ប្រឈមនឹងស្ថានភាពលំបាកជាច្រើន តែពេលអ្នកនិយាយអំពីកីឡាករល្អបំផុតលើលោក… តើអ្នកមើលការលេងរបស់ Henry ទេ? អ្នកលើកតម្កើងមនុស្សដែលមិនសមលើកតម្កើង”។
Mbappe ហាក់ពុំទាន់បានបង្ហាញសមត្ថភាពល្អបំផុតរបស់គេនៅឡើយទេ ក្នុងនាជាកីឡាកររបស់ Real Madrid។ តាំងពីគេចូលរួមនៅទឹកដី Santiago Bernabeu ដោយពុំមានតម្លៃផ្ទេរកាលពីរដូវក្ដៅឆ្នាំ ២០២៤ គេរកគ្រាប់បាល់បាន១៤គ្រាប់ និង assist ៣គ្រាប់ផ្សេងទៀត ពីការបង្ហាញខ្លួន២៧ប្រកួតសម្រាប់ក្លឹប ដែលក្នុងនោះមានមួយគ្រាប់គេរកបាន ក្នុងប្រកួតបរាជ័យ ៥-២ ក្រោមថ្វីជើងរបស់ Barcelona នៅវគ្គផ្ដាច់ព្រ័ត្រ Spanish Super Cup។
Mbappe និងសមាជិកផ្សេងទៀតរបស់ក្រុមអធិរាជស នឹងត្រៀមសម្រាប់ការប្រកួតលើទីលាន នារាត្រីនេះក្នុងពានរង្វាន់ Copa del Rey វគ្គ១៦ក្រុមចុងក្រោយទល់ Celta Vigo៕
