មានរយៈពេល៦ខែមកហើយដែលវីរៈកីឡាការិនី កែ ឡេង បានចាកចេញពីមន្ទីរពេទ្យដែលអ្នកស្រីបានចូលសម្រាកព្យាបាលជំងឺសម្ពាធឈាមឡើងខ្ពស់។ ម្ចាស់មេដាយមាសប៉េតង់ពិភពលោក៤សម័យបញ្ជាក់ថា បានធូរស្បើយពីជំងឺមួយនេះ តែសុខភាពនៅមិនទាន់វិលមកសភាពដើម១០០ភាគរយទេ។
ឧត្ដមសេនីយ៍ទោក្របខណ្ឌក្រសួងការពារជាតិដដែលប្រាប់ថា រៀងរាល់ថ្ងៃនេះបានខិតខំយ៉ាងខ្លាំងអនុវត្តតាមវេជ្ជបញ្ជារបស់ពេទ្យដើម្បីរក្សាស្ថានភាពសុខភាពឱ្យបាននឹងនរទាំងការហូបចុក និងលំហាត់ប្រាណ។
អ្នកស្រីបញ្ជាក់ថា នឹងអាចចូលបង្ហាត់វិញបាននាដំណាច់ឆ្នាំ២០២៣នេះ។
អ្នកស្រី កែ ឡេង បានផ្ដើមលេងកីឡាដំបូង គឺកីឡាបាល់ទះ ក្នុងឆ្នាំ១៩៨៦ រហូតដល់ឆ្នាំ១៩៩៣ ទើប ប្ដូរមកលេងកីឡាប៉េតង់។ អ្នកស្រី ដណ្ដើមបានមេដាយមាសពិភពលោក ៤ជំនាន់ជាប់ៗគ្នា លើវិញ្ញាសាវាយយកពិន្ទុ កាលពីឆ្នាំ២០១៣ ឆ្នាំ២០១៥ ឆ្នាំ២០១៧ និងឆ្នាំ២០១៩៕
